Во пресрет на состанокот на Врховниот воен совет, турскиот претседател Реџеп Таип Ердоган порача дека Турција ќе продолжи со решителни потези во областа на безбедноста, економијата и надворешната политика, најавувајќи дека 2025 година ќе биде пресвртна точка во реализацијата на визијата „Векот на Турција“.
„Турција презема историски чекори за да ја заштити иднината на нацијата“, изјави Ердоган во вторникот, непосредно пред да претседава со годишниот состанок на Врховниот воен совет.
Во обраќањето што го прочита на свечениот прием во мавзолејот на Мустафа Кемал Ататурк — основачот на современа Турција — Ердоган нагласи дека борбата Турција да стане водечка сила во регионот продолжува, и покрај бројните предизвици и притисоци од внатрешни и надворешни фактори.
„Нашата борба за лидерство во регионот, во услови на променет глобален поредок, се одвива и покрај поставените стапици и нападите што доаѓаат од сите страни“, рече турскиот претседател.
Тој додаде дека државата дејствува на сите фронтови — од безбедноста и демократијата, преку економијата и технологијата, па сè до одбранбената индустрија и надворешната политика — со цел долгорочна стабилност и просперитет.
„Убедени сме дека состанокот на Советот во 2025 ќе означи нова пресвртница на патот кон реализација на визијата Векот на Турција“, подвлече Ердоган, кој ја посети Анкара заедно со членовите на Советот.
Во рамки на посетата, Ердоган му оддаде почит на Ататурк, како и на сите кои ги жртвувале своите животи за иднината на Турција.
