Драма на аеродромот во Палма де Мајорка: Итна евакуација на авион на Ryanair, 18 лица полесно повредени – се појави и првата снимка [ВИДЕО]

Рано утрово на аеродромот во Палма де Мајорка се случи инцидент што предизвика вознемиреност кај патниците на летот на „Ryanair“ кон Манчестер. Поради лажна дојава за пожар, авионот беше итно евакуиран, а 18 патници се здобија со полесни повреди, потврдија локалните власти.

Инцидентот се случил во саботата околу 00:30 часот, кога службите за итна интервенција добиле пријава за наводен пожар во авион кој се наоѓал на пистата. Според локалниот портал Crónica Balear, на самото место брзо интервенирале противпожарни и медицински екипи.

Шест лица биле пренесени во болница за дополнителни прегледи — тројца во Клиничкиот центар Ротгер и тројца во болницата Палмапланас. Останатите патници биле згрижени на самото место, најчесто со полесни повреди како истегнувања и нагмечувања.

Во евакуацијата учествувале припадници на Цивилната гарда и аеродромските пожарникари, а дел од патниците дури самостојно го напуштиле авионот преку крилата, во обид што побрзо да се оддалечат од леталото за кое се сомневале дека гори.

Од „Ryanair“ потврдија дека полетувањето било откажано поради лажна индикација за пожар.

„Летот од Палма за Манчестер на 4 јули беше откажан поради лажен сигнал за пожар. Патниците беа евакуирани со помош на надувливи лизгалки и вратени во терминалот,“ изјави портпаролот на компанијата.

Тој додаде дека неколку патници претрпеле полесни повреди при евакуацијата, поради што била побарана итна медицинска помош. За да се минимизираат доцнењата, „Ryanair“ организираше заменски лет кој полета од Палма во 07:05 часот.

„Искрено се извинуваме на сите патници за непријатностите кои ги претрпеа,“ соопштија од авиокомпанијата.