Италијанската премиерка воведе данок од 2 евра за секој мал пакет што пристигнува во земјата од трети држави, со цел да се ограничи приливот на евтина стока и да се зголемат приходи во државниот буџет. Меѓутоа, мерката, која стапи на сила на 1 јануари 2026 година за пратки со вредност под 150 евра, донесе спротивен ефект.
Логистичките компании и аеродромските оператори пријавија значителен пад на директните воздушни пратки од земји надвор од ЕУ. Според Валентина Менин, извршна директорка на индустриската група Асаеропорти, која управува со 32 италијански аеродроми, данокот се врати како бумеранг, а целиот логистички сектор губи работни места. Меѓу 1 и 20 јануари бројот на мали пакети што стигнале директно во Италија се намалил за 36 проценти во споредба со истиот период лани.
За да ја заобиколат таксата, товарните авиони од Кина и други трети земји повеќе не слетуваат директно во Италија. Наместо тоа, пратките пристигнуваат во Белгија, Холандија или Унгарија, а потоа продолжуваат со камиони кон Италија. На пример, најмалку 30 карго-летови биле пренасочени од Милано Малпенса кон Лиеж, Амстердам и Будимпешта.
Проблемот за Рим е и тајмингот. Европските министри за финансии се договорија од 1 јули 2026 година да воведат фиксна такса од 3 евра за сите мали пакети што пристигнуваат во ЕУ. Италија, сепак, одлучи да го направи тоа порано и остана осамена, па дел од италијанските пратеници сега предлагаат одложување на националниот данок до јули за да се избегне заобиколување.
Според Европскиот економски и социјален комитет, во ЕУ секој ден пристигнуваат околу 12 милиони мали пакети, најмногу од Кина, што создава нелојална конкуренција за европските трговци и дополнителни сомнежи околу здравствени и безбедносни стандарди.
Италија не е единствена земја со ваков пристап – Романија од 1 јануари 2026 година воведе такса од околу 5 евра по пакет. Европската такса, која ќе важи од јули, ќе ја отежни можноста за заобиколување на данокот.
