Обединетото Кралство испрати борбени авиони и воена опрема на Блискиот Исток, како дел од поддршката за сојузниците и подготвеност за евентуални операции, додека тензиите меѓу Израел и Иран драматично ескалираат. Потегот уследи откако Техеран упати сериозно предупредување дека британските и сојузничките бази во регионот ќе станат легитимни цели доколку Велика Британија реши да интервенира во корист на Израел.
Британскиот премиер Киер Стармер, на пат кон самитот на Г7 во Канада, изјави дека „не ја исклучува можноста за воена поддршка“ и дека веќе е започнато распоредување на одредени сили и опрема во регионот, вклучително и борбени авиони. „Ова се случува веќе – тоа е дел од нашата поддршка во случај на потреба низ целиот регион“, изјави Стармер.
Иако Британија досега не учествуваше директно во тековниот конфликт, премиерот одби да каже дали ќе постапи исто како минатата година, кога Лондон интервенираше по иранскиот балистички напад. „Нема да навлегувам во оперативни детали – ситуацијата се развива и постојано се менува“, додаде тој.
Стармер исто така не сакаше да коментира дали Велика Британија имала претходни информации за израелските напади кои го иницираа најинтензивниот судир меѓу Тел Авив и Техеран во последните децении. „Во постојан контакт сме со нашите сојузници, вклучително и со САД, но нема да откривам какви информации имавме или имаме“, рече премиерот.
Распоредувањето на британските сили се случува во критичен момент за регионот, каде што секое дополнително вклучување на надворешни сили може да го прошири конфликтот надвор од границите на Израел и Иран.
