Општина Илинден годинава повторно им нуди значајна поддршка на локалните земјоделци преку обезбедување бесплатни агрохемиски анализи на почвата. Во соработка со Факултет за земјоделски науки и храна, општината објави Јавен повик за сите заинтересирани производители кои сакаат да добијат прецизни информации за состојбата на нивното обработливо земјиште.
„Со овие анализи, земјоделците ќе добијат прецизна слика за состојбата на почвата што ја обработуваат. Така ќе можат навремено и правилно да ја ѓубрат, да ги зголемат приносите и да го подобрат квалитетот на своите производи, а истовремено ќе придонесат за намалување на загадувањето“, изјави градоначалникот Александар Георгиевски.
Овој проект е дел од Стратешкиот план за развој на општината и се реализира континуирано, со намера да се опфатат што е можно повеќе земјоделци и да се обезбедат детални податоци за состојбата на обработливото земјиште на целата територија на Илинден.
