Македонија денеска ќе биде под влијание на променливо облачно и нестабилно време со повремени локални врнежи од дожд и грмежи, информира Управата за хидрометеоролошки работи (УХМР).
Според прогнозата, на одделни места се очекуваат поинтензивни атмосферски процеси проследени со пороен дожд од над 15 литри на квадратен метар, силни грмежи, ветер со брзина поголема од 60 километри на час и услови за краткотрајно невреме со појава на град.
Утринските температури ќе се движат од 11 до 19 степени, додека дневните ќе достигнат од 27 до 35 степени Целзиусови.
Во Скопје времето ќе биде променливо облачно и нестабилно, со повремени врнежи од дожд, грмежи и засилен ветер. Во делови од котлината се очекуваат услови за краткотрајно невреме со пообилен пороен дожд и појава на град. Температурата ќе се движи од минимални 17 до максимални 32 степени.
Според УХМР, нестабилното време ќе продолжи и утре. Локално повторно се очекуваат поинтензивни врнежи, електрични празнења, силен ветер и услови за појава на град, поради што се препорачува граѓаните да бидат внимателни и да ги следат најновите временски информации.
