Во полициска акција спроведена во изминатите 24 часа на повеќе локации низ земјава, Министерството за внатрешни работи приведе вкупно 11 лица осомничени за недозволено поседување наркотични средства. Акциите биле реализирани на граничниот премин Табановце, во Скопје, Битола и Гостивар, при што биле запленети различни видови дрога, тутунски производи и други предмети поврзани со кривични дела.
На граничниот премин Табановце, при влез во државата, била уапсена 53-годишна германска државјанка. При контрола на нејзиниот „Фолксваген Кампер“, полицијата открила повеќе пакувања со бела прашкаста материја, помала количина марихуана, десетици пакувања тутун и цигари, како и предмети на кои биле пронајдени траги од наркотични средства.
На подрачјето на Скопје, полициските службеници лишиле од слобода седум лица на неколку различни локации. Меѓу приведените има македонски државјани, но и странски државјани од Турција и Канада. Кај нив биле пронајдени бела прашкаста материја, кафеава грутчеста супстанца и марихуана.
Активности биле спроведени и во Битола, каде што на улицата „Партизанска“ биле приведени две лица, а кај едно од нив полицијата пронашла марихуана.
Во гостиварското село Дебреше, полицијата уапсила 21-годишен жител на Врановце. При преглед на неговата торба во возило „Нисан“ биле пронајдени марихуана и пари. Во одделен случај во центарот на Гостивар, по претходни оперативни сознанија, биле пронајдени повеќе пакувања со марихуана оставени во корпа за отпадоци.
Од МВР информираат дека сите одземени материи ќе бидат предмет на вештачење, а по комплетирањето на истрагите ќе следуваат соодветни поднесоци до надлежните обвинителства.
