До денеска претпладне до Државната изборна комисија (ДИК) се поднесени вкупно 16 приговори за постапката на сумирање и утврдување на резултатите од вториот круг од локалните избори, што се одржа на 2 ноември. Рокот за поднесување на приговори завршува денеска во 16:30 часот, односно 48 часа по објавувањето на првичните резултати.
Приговори поднел Хаким Рамадани, поддржан од Влен, за избирачките места 2032, 2033, 2034 и 2035 во општина Брвеница. Во оваа општина во вториот круг победи Јовица Илиевски, поддржан од ВМРО-ДПМНЕ и коалицијата, со 4.374 гласа, додека Рамадани освои 4.224 гласа.
Коалицијата „Твоја Македонија“ поднела десет приговори за избирачките места 2955, 2956, 2956/1, 2959, 2959/1, 2961, 2961/1, 2971, 2971/1 и 2973 во Шуто Оризари. И Сојузот на Ромите поднел приговори за гласачките места 2961, 2962 и 2966 во истата општина. Во Шуто Оризари, победник е Курто Дудуш од Унијата на Ромите со 3.894 гласа, додека Ерџан Демир, поддржан од коалиција со ВМРО-ДПМНЕ, освои 3.406 гласа.
Коалицијата „Искуство за успех“, која го поддржуваше Стевчо Јакимовски, поднела приговори за гласањето во Карпош за избирачките места 2613 и 2631. Во оваа општина победи кандидатот поддржан од ВМРО-ДПМНЕ, Сотир Лукровски, со 13.512 гласа, додека Јакимовски освои 12.378 гласа.
Според ДИК, седница за одлучување по поднесените приговори најверојатно ќе се одржи утре.
