Министерството за внатрешни работи наскоро ќе ја засили контролата на учесниците во сообраќајот со нова генерација брзи тестови за дрога преку плунка. Станува збор за имунохроматографски тестови кои можат да ги користат овластени полициски службеници без медицинско предзнаење.
Тестовите се едноставни за употреба, примерокот се зема за помалку од една минута со орален брис, а резултатите се видливи за максимум 10 минути, без дополнителна електронска опрема. Новите тестови детектираат шест видови психоактивни супстанции: THC, кокаин, амфетамин и метамфетамин, опијати како морфин и хероин, екстази (MDMA) и бензодиазепини. Тестовите се CE сертифицирани и произведени според европски стандарди, со ISO 13485 за квалитет на медицински уреди.
Министерот за внатрешни работи Панче Тошковски истакна дека оваа мерка е дел од поширок план за зајакнување на безбедноста во сообраќајот, кој вклучува ревидирање на законските одредби, зајакнување на системот „Безбеден град“, дигитализација на евиденцијата за прекршоци и строги санкции за рецидивисти.
„Возењето под дејство на опојни дроги е исто толку опасно како и возењето под алкохол. Со воведувањето на овие тестови, МВР ќе има современи и сигурни средства за проверка на возачите, што значително ќе ја зголеми безбедноста на патиштата“, рече Тошковски.
Испораката на тестовите се очекува најдоцна 30 дена по потпишувањето на договорот, а документацијата ќе биде достапна и на македонски јазик. Обуката за полициските службеници за правилна примена и читање на резултатите ќе ја обезбеди добавувачот.