Жителите на Струга повторно се соочуваат со сериозен проблем со водоснабдувањето, откако по обилните дождови во последните денови се зголеми заматеноста на изворите кои го снабдуваат градот со вода за пиење. Според податоците од Центарот за јавно здравје, вчерашните мерења покажуваат дека заматеноста достигнува 3,92, што значително ја надминува минимално дозволената граница од 1,5.
Жителите на селото Шум, од каде потекнува поголемиот дел од водата за Струга, најавуваат протести и предупредуваат дека проблемот станува хроничен.
Во меѓувреме, Регионалната канцеларија на Народниот правобранител во Кичево отвори постапка по сопствена иницијатива за да ја испита ситуацијата. „Правото на безбедна и доволна вода за пиење е основно човеково право и е тесно поврзано со правото на живот, здравје и човечко достоинство. Секое продолжено ограничување или сомнеж за квалитетот на водата создава несигурност и влијае врз јавниот интерес“, истакна Илбер Даути, Народен правобранител, Регионална канцеларија – Кичево.
