Претседателот на СДСМ, Венко Филипче, во интервју за телевизија Сител изјави дека повеќе години е мета на црна кампања од страна на ВМРО-ДПМНЕ.
„Прво ми препишуваа куќа во Нерези, па авиокомпанија и стокатница во Дубаи, сега јахта… Нема да се изненадам ако зимава застанат пред некоја куќа во Сент Мориц и кажат дека е моја“, изјави Филипче.
Тој нагласи дека владејачката партија, во отсуство на реални резултати, се потпира единствено на дезинформации и медиумски спинови.
„Немаат што друго да прават, бидејќи апсолутно нема никаков перформанс во Владата. Немаат со што да се пофалат, ги демонтираме во сите мерки и бројки“, додаде лидерот на СДСМ.
Филипче посочи дека граѓаните веќе ги чувствуваат последиците од неспособноста на актуелната власт, преку растечки цени, поскапување на основните трошоци, слабост во економските политики и недостиг на визија.
„Оваа влада ќе оди во историјата како една фуснота, затоа што буквално ништо нема да направат“, заклучи Филипче.
