Агенцијата на Соединетите Американски Држави за меѓународен развој (УСАИД) официјално е во фаза на затворање, потврди американскиот државен секретар Марко Рубио.
„Од јануари им заштедивме на даночните обврзници десетици милијарди долари. Со мал број клучни програми кои се префрлени во Стејт департментот, УСАИД е во режим на затворање. Рос Ваут го презеде раководството на процесот на ликвидација на оваа агенција, која одамна го загуби својот пат“, напиша Рубио на социјалната мрежа Х.
Тој истакна дека претседателот Доналд Трамп го поддржал назначувањето на Ваут, близок соработник на Рубио, да управува со завршните процедури околу затворањето.
Белата куќа денеска соопшти дека Трамп укинал 15 програми за странска помош, вредни 4,9 милијарди долари, кои претходно беа под надлежност на Стејт департментот, УСАИД и други финансиски инструменти.
Работата на УСАИД фактички беше прекината уште во февруари, а во март Рубио, назначен како привремен раководител, соопшти дека владата суспендирала повеќе од 80 отсто од програмите на агенцијата.
