Управата за хидрометеоролошки работи (УХМР) соопшти дека водостоите на речните текови низ земјава се алармантно високи и значително надминуваат просечните вредности за месец ноември.
Најдрастични зголемувања се забележуваат кај некои од поголемите реки: Треска кај Македонски Брод достигна 108 сантиметри, осум пати повеќе од просечните 13 см, додека Сатеска во Ботун бележи водостој дванаесет пати над просекот (64 см наспроти 5 см). Црна Река во Новаци скокна од 65 на 246 сантиметри, а Вардар кај Јегуновце и Велес бележи двојно повисоки вредности од ноемврискиот просек.
Реките Пчиња и Бабуна покажуваат трикратно зголемување на нивото, додека единствено реката Брегалница во Берово останува под просекот, со 12 см наместо вообичаените 22 см.
Природните езера, и покрај минималните дневни промени, се задржуваат во рамките на просечните вредности за овој период од годината, а температурата на сите три големи езера е во сезонски просек.
