Иако деновите на скара носат опуштање и уживање во храна, често знаат да завршат со непријатни дигестивни тегоби како надуеност, мачнина и тежина во желудникот. Стручњаците посочуваат дека со неколку едноставни навики и намирници може значително да се олесни варењето и да се намалат овие непријатности.
Еден од најчесто споменуваните природни „лекови“ е сода бикарбона помешана со вода, која може да помогне во неутрализирање на желудочната киселина и намалување на надуеноста. Покрај тоа, се препорачува и чај од глуварче, кој според некои истражувања може да биде поефикасен за стимулирање на варењето од класичниот чај од камилица.
Помош може да донесе и лесна масажа на стомакот, која го стимулира движењето на цревата и го олеснува варењето. Комбинацијата од топла вода и лимон исто така се смета за корисна, бидејќи може да ја поттикне работата на дигестивниот систем и да ја намали надуеноста.
Стручњаците советуваат и задолжително консумирање на зелена салата при оброци со скара, бидејќи таа може да го олесни варењето на потешката и термички обработена храна.
Иако празничните и скара-оброци се време за уживање, умереноста и правилниот избор на намирници можат да помогнат да се избегнат непријатните последици по обилно јадење.
