На раперот Кање Вест, познат под уметничкото име „Је“, му беше укината визата за Австралија откако објави песна насловена „Хајл Хитлер“ (Heil Hitler), соопшти денеска австралискиот министер за внатрешни работи, Тони Берк.
Берк истакна дека Вест одамна патува во Австралија и има семејство таму, но дека неговата контроверзна песна е критикувана за промовирање антисемитизам и за оддавање почит на Адолф Хитлер, лидерот на нацистичка Германија.
„Тој одамна доаѓа во Австралија, има семејство овде и изјави многу навредливи работи, кои моите службеници ги разгледаа повторно по објавувањето на песната. Сега тој повеќе нема важечка виза за Австралија“, изјави Берк за државната телевизија.
Министерот додаде дека Австралија „веќе има доволно проблеми и не може да си дозволи намерно внесување нетрпеливост“.
Од почетокот на конфликтот меѓу Израел и Хамас во октомври 2023 година, во најголемите австралиски градови, Сиднеј и Мелбурн, е забележан пораст на антисемитски напади.
