Водно денеска е центар на спортот, рекреацијата и масовното искачување, каде се одржува 14-тото издание на Sparkasse Life – Прв до врв – една од најмасовните спортско-рекреативни манифестации во земјава.
Илјадници љубители на природата, велосипедисти, тркачи, рекреативци и компании и оваа година ќе се обидат да стигнат до врвот на Водно преку неколку различни дисциплини.
Настанот се одржува во пет категории:
Планинско трчање на 4,5 километри
Планински велосипедизам на 9 километри
Друмски велосипедизам на 11,4 километри
E-bike трка на 9 километри
Тим-билдинг трка за компании „Summit Run“ на 4,5 километри
Велосипедските трки стартуваат во 9:45 часот пред Музеј на град Скопје, со летечки старт кај ООУ „Кочо Рацин“, додека трчањето и тим-билдинг трката започнуваат во 10:00 часот пред училиштето.
Патеките минуваат низ контролните точки кај полицијата, Средно Водно и завршуваат на самиот врв на Водно.
Организаторите најавија финишер медали за сите учесници кои успешно ќе ја завршат трката, како и награди за најдобрите натпреварувачи во машка и женска конкуренција.
Дополнително, обезбеден е и награден фонд од 1.000 евра за поставување нови рекорди.
На врвот на Водно ќе има и целодневна забавна програма со храна, пијалаци, диџеј и настап на бенд во живо, по што ќе следува официјалното прогласување на победниците.
