Археолозите во Египет открија древни гробници стари околу 5.000 години, чии архитектонски карактеристики може да дадат нови одговори за развојот на градежните техники што подоцна биле користени при изградбата на познатите пирамиди во Гиза.
Откритието е направено на локалитетот Џабал ал-Тајр, во египетската покраина Минија, покрај реката Нил, област која илјадници години служела како значајно погребно место.
Според истражувачите, двете новооткриени гробници покажуваат напредни градежни решенија кои претходат на периодот во кој биле изградени големите пирамиди. Ѕидовите на објектите се пошироки во основата и постепено се стеснуваат кон врвот, принцип кој подоцна бил применет кај Степенестата пирамида и пирамидите на фараоните Кеопс, Кефрен и Микерин.
Археолозите пронашле и траги од обработка на камен, како и големи дрвени потпори вградени во конструкциите, кои служеле за дополнително зајакнување на ѕидовите. Некои од дрвените елементи се протегале речиси по целата должина на ѕидовите.
Генералниот секретар на Врховниот совет за антиквитети на Египет, д-р Хишам Ел-Леити, изјавил дека првичните анализи покажуваат сличности меѓу новите гробници и гробницата на кралот Ден, еден од најзначајните владетели од Првата египетска династија.
Овој период, кој започнал околу 3100 година пред новата ера со обединувањето на Горен и Долен Египет, бил клучен за развојот на организираната држава, писменоста, инженерството и монументалната архитектура.
Египетскиот министер за туризам и антиквитети, Шериф Фати, оценил дека откриените објекти ќе помогнат во подобро разбирање на развојот на погребната архитектура и начинот на кој древните Египќани постепено ги усовршувале техниките за изградба на огромни камени споменици.
Покрај двете гробници, археолозите откриле и уште постаро гробиште од периодот пред обединувањето на Египет. Пронајдени се остатоци од луѓе погребани во згрчена положба, завиткани во растителни простирки, како и керамика карактеристична за периодите Накда II и Накда III.
Истражувачите сметаат дека наодите од Џабал ал-Тајр можат значително да го променат досегашното разбирање за тоа кога и како се развиле инженерските знаења кои подоцна овозможиле изградба на едни од највеличествените градби во историјата на човештвото.
