Еден од најомилените спортски парови на деценијата, Ана Ивановиќ и Бастијан Швајнштајгер, официјално го заврши своето љубовно поглавје. Германските медиуми објавија фотографии на кои поранешниот фудбалер опуштено ужива на плажите во Грција со новата партнерка, бугарската инфлуенсерка и фитнес инструкторка Силва Капитанова.
Фотографиите од нежности на сончевите брегови ја потврдуваат врската која, според извори од медиумите Bild и Bunte, започнала уште додека Швајнштајгер сè уште бил во брак со поранешната српска тенисерка. Разводот, кој медиумите го опишуваат како „итен и дискретен“, се случил во Швајцарија, без многу јавен циркус, но последиците се почувствуваа во медиумите и кај јавноста.
Ана и Бастијан беа во брак од 2016 година, венчавајќи се романтично во Венеција. Заедно имаат три сина – Лука, Леон и Тео – и низ годините живееја во Чикаго, Белград, Минхен и Мајорка. Токму на Мајорка, каде што Ана поседува вила, Бастијан наводно ја запознал Силва, пред училиштето што го посетуваат нивните деца.
Според медиумите, Силва е мајка на две деца, поранешна сопруга на член на позната уметничка фамилија, и веќе подолго време била во контакт со Швајнштајгер. Иако Ана не дала ниту една јавна изјава за крајот на бракот, нејзината тишина се интерпретира како знак на достоинство. Додека Швајнштајгер го живее „новиот почеток“, Ана блеска во јавноста – последно од Лондон, каде што ја следеше Вимблдон, насмеана и со стил.
И покрај личниот раздор, професионалната врска меѓу нив останува. Тие сè уште се заеднички амбасадори на модниот бренд Brax до 2027 година. Дали разводот ќе влијае на нивниот договор, засега не е познато.
Во меѓувреме, Ана продолжува да го гради својот живот далеку од сенките на поранешниот брак. Како што напиша една нејзина следбеничка: „Твоето време допрва доаѓа“.
