Морските длабочини и понатаму остануваат едно од најмалку истражените места на Земјата, а научниците сè почесто откриваат суштества кои изгледаат како да потекнуваат од научнофантастичен филм. Еден необичен експеримент спроведен во Мексиканскиот Залив повторно ја шокираше јавноста откако истражувачи спуштиле три мртви алигатори на речиси две илјади метри длабочина за да следат што ќе се случи со нивните тела.
Истражувањето го спровел тим од Louisiana Universities Marine Consortium, а целта била да се открие како длабокоморските чистачи реагираат на големи влекачи со исклучително дебела и оклопна кожа. Научниците претпоставувале дека таквата заштита би можела да оттурне дел од организмите што се хранат со мрши, но океанот многу брзо ги разуверил.
Веќе по само еден ден, првиот алигатор бил нападнат од огромни изоподи – морски суштества кои изгледаат како џиновски мокрици и можат да достигнат должина од околу 30 сантиметри. Истражувачите забележале како тие брзо ја пробиваат заштитната кожа на животното и почнуваат да се хранат одвнатре. Според научниците, сцените биле морничави, но во исто време обезбедиле вреден увид во тоа како функционира синџирот на исхрана во екстремните длабочини на океанот.
Ниту вториот алигатор не останал долго недопрен. Неговите остатоци речиси целосно исчезнале за само 51 ден, а на морското дно останале само скелетот, сидрото и јажето со кое бил прицврстен. Токму тие остатоци довеле до едно од најинтересните откритија во целиот експеримент.
Научниците откриле нов вид црви кои се хранат со коски, познати како Osedax, а кои јавноста често ги нарекува „зомби црви“. До тогаш вакви организми никогаш не биле регистрирани во тој дел од светот. ДНК анализата покажала дека нивните најблиски сродници биле пронајдени во водите околу Антарктикот и крај брегот на Калифорнија. Новиот вид сè уште нема официјално научно име, но експертите веруваат дека може да помогне во подобро разбирање на еволуцијата на организмите кои преживуваат во најекстремните морски услови.
Најголема мистерија сепак оставил третиот алигатор. За разлика од првите два примероци, неговото тело целосно исчезнало за само осум дена. Кога научниците повторно ја провериле локацијата, пронашле само тег, синџир и отфрлено јаже – од алигаторот немало никаква трага.
Истражувачите претпоставуваат дека животното било одвлечено од голем предатор, најверојатно ајкула, доволно силна за заедно со телото да повлече и околу 21 килограм опрема што била прикачена за него.
Иако на прв поглед експериментот изгледа бизарно, научниците велат дека тој уште еднаш покажал колку океанските длабочини се непредвидливи и колку малку човештвото всушност знае за животот на морското дно. Во свет без сончева светлина, под огромен притисок и во речиси целосен мрак, постојат суштества кои за рекордно кратко време можат да разложат огромни животински тела, но и организми кои науката допрва треба да ги открие и именува.
