Според податоците објавени на Македонската берза, во „Реплек“ се евидентирани нови купопродажби на акции што донесоа промени во сопственичката структура на компанијата. Купувачи се Сава пензиски фонд и заменик-генералниот директор на фирмата, Коста Котески, додека продавач останува компанијата „Настел“.
Сава пензиски фонд, кој е меѓу поголемите акционери, дополнително го зголеми својот удел. Фондот купил 90 нови акции и сега располага со вкупно 16.793 акции, односно 6,48 проценти од вкупниот број издадени хартии од вредност.
Коста Котески, член на Управниот одбор и директор за снабдување и комерција во „Реплек“, се стекнал со 10 нови акции. Со ова, неговиот вкупен број на обични акции достигнува 410.
Во улога на продавач и понатаму останува „Настел“, кој продал 95 акции и сега поседува 15.950 акции, што претставува 6,15 проценти удел.
Берзанските податоци покажуваат дека вчера била реализирана и една блок-трансакција со 250 акции на „Реплек“, во вредност од 3.975.000 денари (околу 64,6 илјади евра). Цената по акција изнесувала 15.900 денари, што е нешто пониска од вчерашниот просек од 16.000 денари.
На официјалниот пазар биле истргувани дополнителни 75 акции, со вкупен промет од 1,2 милиони денари, односно околу 19,5 илјади евра.
