Мелони предупредува: Трговска војна на Западот би нѐ ослабнала пред заедничките глобални предизвици
Италијанската премиерка Џорџа Мелони синоќа изрази загриженост поради можноста за трговска војна меѓу Соединетите Американски Држави и Европската унија, откако американскиот претседател Доналд Трамп најави воведување на 30 проценти царини за производите увезени од ЕУ.
„Трговската војна на Западот би нè ослабнала сите пред глобалните предизвици со кои се соочуваме заедно“, изјави Мелони, додавајќи дека Европа има доволно економска и финансиска моќ за да го одбрани својот интерес и да постигне фер и разумен договор.
„Италија ќе го направи својот дел – како и секогаш“, истакна премиерката, додека Европската унија најави дека својот официјален одговор ќе го одложи за почетокот на август, надевајќи се дека до тогаш ќе биде постигнат компромис.
Трамп во саботата соопшти дека од 1 август ќе воведе царини од 30 проценти на сите производи што доаѓаат од Европската унија и Мексико, вклучително и индустриски и земјоделски производи.
Најавата предизвика силни реакции во Италија. Опозициските партии остро ја нападнаа Мелони и нејзината владејачка партија „Браќа на Италија“, обвинувајќи ја за попустливост кон Вашингтон. Лидерот на Движењето Пет Ѕвезди, Џузепе Конте, ја обвини премиерката дека „ја наведнала главата“ пред американските закани.
Во меѓувреме, претседателката на Европската комисија Урсула фон дер Лајен изјави дека Брисел засега нема да презема контрамерки, како одговор на американските царини за челик и алуминиум, со надеж дека преговорите ќе резултираат со договор кој ќе ги спречи најавените царини.
