Американскиот Балкански Трговски Центар (АБТЦ) и винарската визба „Тиквеш“ беа меѓу гостите на овогодинешниот престижен годишен ручек организиран од Трговската комора на Илиноис, на кој присуствуваа претставници на водечки компании во државата, бизнисмени, институционални претставници и политички лидери.
Настанот беше во знак на успехот, растот и достигнувањата на деловната заедница и претставуваше можност АБТЦ да ја сподели својата визија и мисија, но и да слушне и истакне инспиративни приказни за успешни бизниси и лидери.
-Работиме напорно и сакаме АБТЦ да прерасне во лидер кој ќе го гради мостот помеѓу Американските и Балканските бизниси, како во Америка, така и на Балканот. Затоа сме тука, да покажеме дека ништо не е невозможно, туку напротив, полека но сигурно се движиме кон целта. Присуствувајќи на вакви настани, сме чекор поблиску до остварување на нашата мисија и визија-изјави Бобан Попевски, еден од основачите на АБТС.
Годишниот ручек ги собра истакнатите професионалци и организации од Илиноис, ги прослави оние кои дале значаен придонес и создаде можности за вмрежување, соработка и воспоставување нови деловни контакти.
За АБТЦ, учеството на ваков значаен собир претставуваше можност да биде дел од заедница на лидери кои придонесуваат кон развојот на деловниот сектор и кон создавањето посилни врски низ Илиноис и пошироко.
За првпат, на настанот се претстави и винарската визба „Тиквеш“, реномирана македонска компанија, која им се придружи на американските бизниси и изложувачи во претставувањето на своите производи пред гостите и деловните лидери од целиот Илиноис.
„Денес сме тука да го претставиме она што го нудиме и да ги претставиме вината произведени од винарската визба „Тиквеш“. Ви ветувам дека нема да ве разочараме. Напротив, ќе ве направиме горди на прекрасните и неодоливи вина од Македонија“, изјави Светозар Јаневски, сопственик на винарската визба „Тиквеш“.
Гостите имаа можност да се сретнат со изложувачите и да дознаат повеќе за нивните производи и услуги. Меѓу изложувачите беше и „Тиквеш“, кој на присутните им претстави избор од своите вина.
Настанот започна со церемонија на почесна гарда и интонирање на националната химна, изведена од вокалист на Полициската управа на Чикаго, со што беше поставен формален и свечен тон на собирот.
Меѓу говорниците беше и гувернерот на Илиноис, Џ.Б. Прицкер, кој им посака добредојде на присутните и зборуваше за економската иднина на државата и деловното опкружување.
„Драго ми е што повторно сум дел од официјалниот ручек на Трговската комора на Илиноис. Ова значи многу за сите нас. Тоа значи подобра иднина, подобра инвестициска клима во оваа држава и подобри услови за работење на бизнисите“, рече Притцкер.
Меѓу присутните истакнати гости беше и Марко Николиќ, конзул на Република Србија во Чикаго, кој исто така беше поканет на ручекот.
Во разговор за „First Balkan Media“, конзулот Николиќ ги сподели своите впечатоци од настанот и неговото значење за деловната и дипломатската заедница.
„Драго ми е што сум денес тука и ми е посебна чест да ги видам моите сонародници меѓу присутните на ваков настан. Тоа покажува дека нашите луѓе успеваат во Америка, градат свои бизниси, ја следат својата визија и го наоѓаат вистинскиот пат кон успехот“, рече конзулот Николиќ.
Годишниот ручек им овозможи на бизнис и политички лидери од целиот Илиноис да се соберат, вмрежат, да разменат идеи и да воспостават нови деловни и професионални односи.
За Американскиот Балкански трговски центар, учеството на настан од ваков обем претставува уште една можност за зајакнување на врските меѓу Балканско-Американската бизнис заедница и пошироката деловна и институционална заедница на Илиноис.
