Недостаток од 7.813,49 килограми сув цвет од медицински канабис е утврден при контрола во правно лице во селото Борисово, општина Ново Село. За оваа количина компанијата немала соодветна документација и покритие, информираат од полицијата.
СВР Струмица поднесе кривична пријава против правното лице и неговиот управител В.К., од селото Ново Село, со престој во Струмица, поради сомнение за кривични дела според член 95-в, ставови 1 и 2, од Законот за контрола на опојни дроги и психотропни супстанции.
Контролата ја спровеле полициски службеници од СВР Струмица и членови на надлежната комисија при Министерството за здравство, во просториите каде што бил складиран сувиот цвет од медицински канабис.
Покрај недостатокот на канабис, биле утврдени и недостатоци во документацијата за ангажираниот кадар, како и отсуство на друга задолжителна документација.
Во соопштението не е наведено што се случило со количината што недостига.
