Членството на Српската напредна партија (СНС) на Александар Вучиќ во Европската народна партија (ЕНП) е доведено во прашање поради контроверзните политики на српскиот претседател. Лидерот на ЕНП, Манфред Вебер, за „Еуроњуз“ потврди дека е покренат процес на проверка на статусот на СНС, нагласувајќи дека „не може да се затвораат очите пред она што се случува во Србија“.
СНС е придружна членка со ограничено право на глас, но политиките на Вучиќ веќе подолго време создаваат тензии во рамките на партијата. Според Вебер, работна група ќе ја води истрагата „во наредните денови“.
ЕНП е критична кон блиските врски на Вучиќ со Владимир Путин, и покрај војната во Украина и санкциите на ЕУ. Присуството на Вучиќ на парадата во Москва на 9 мај предизвика изненадување во Брисел.
Во рамките на ЕНП се води дебата дали СНС да остане во семејството – едни гледаат проблем во неговиот однос кон опозицијата и врските со Путин и Орбан, а други сметаат дека задржувањето на придружното членство е важно за одржување на комуникациски канали со Белград.
