Иранска хакерска група накратко ја презеде веб-страницата на албанскиот парламент, објавувајќи порака со закани и тврдења дека поседува интерна комуникација на пратениците.
Групата „Татковинска правда“ тврди дека добила пристап до разговорите и преписките на „корумпираните членови на парламентот“ во последните месеци. Во пораката хакерите упатија директни закани кон албанските власти, наведувајќи дека се „многу поблиску отколку што мислат“ и дека „овој срам ќе остане засекогаш“.
Неколку часа по нападот, веб-страницата повторно беше достапна, а институциите не соопштија дополнителни детали за евентуална штета или протекување на податоци.
Нападот се случува во контекст на затегнати односи меѓу Албанија и Иран. Тирана во септември 2022 година ги прекина дипломатските односи со Техеран, обвинувајќи го за масовен кибернапад врз државните институции.
Иранската Исламска револуционерна гарда, според медиумските извештаи, разгледувала можност за напад врз кампот на Народните муџахедини на Иран (МЕК) во Албанија, но портпаролот на организацијата, Шахријар Киа, ги оцени информациите како пропаганда. Кампот Ашраф-3, близу Драч, од 2013 година сместува повеќе од 3.000 членови на МЕК.
