Локалните избори во Србија денес се одржуваат во десет општини и градови, но наместо во мирна атмосфера, денот е обележан со бројни инциденти, сомнежи за нерегуларности и засилено полициско присуство.
Гласањето започна во 7 часот наутро и ќе трае до 20 часот, а право на глас имаат вкупно 247.985 граѓани. Изборниот процес го следат и домашни и странски набљудувачи, додека вниманието на јавноста е насочено кон регуларноста и безбедноста.
Уште од раните утрински часови пристигнуваат информации за тензии на повеќе локации. Во Бор е регистрирана физичка пресметка, додека во Бајина Башта група мажи тргнала кон новинарски екипи, по што тие се повлекле од теренот од безбедносни причини.
Во Кула, граѓани пријавуваат сомнежи за организирана купопродажба на гласови во угостителски објект. Според нив, забележани биле лица со ознаки со буквата „Ћ“, а на местото имало и полициско присуство.
Дополнително, во повеќе градови се појавиле информации за сомнителни активности поврзани со изборите, вклучително и наводни кол-центри. Во Кладово, новинарска екипа влегла во просторија во хотел каде што, според нив, се вршеле координации поврзани со гласањето, но присутните одбиле да дадат изјави и се обиделе да се сокријат од камерите.
Паралелно со овие случувања, излезноста расте во текот на денот. До пладне, процентот на излезени гласачи се движи меѓу 30 и 40 проценти во повеќето општини. Највисока излезност е забележана во Кула и Севојно.
Според последните податоци, до 13 часот во Бор излезноста достигнала 36,2 проценти, во Севојно 41 процент, а во Кула дури 44 проценти.
Иако институциите засега не даваат официјални оценки за текот на изборите, бројните пријави од терен укажуваат дека гласањето се одвива во напната атмосфера, со зголемен ризик од инциденти.
