По речиси четири децении пауза, Србија го отвори патот кон нуклеарната енергија. Владата во 2024 година официјално го укина мораториумот на нуклеарно производство, воведен веднаш по Чернобилската катастрофа во 1986 година. Според најновиот извештај на Светската нуклеарна асоцијација (WNA), до 2042 година земјата планира да приклучи први 250 мегавати на електричната мрежа, што би се реализирало преку изградба на еден мал модуларен реактор.
Амбициите на Србија не застануваат тука – до 2050 година се очекува нуклеарниот капацитет да достигне вкупно 1.200 мегавати. За споредба, глобалниот нуклеарен капацитет би можел да порасне дури на 1.446 гигавати, што е значително над целта поставена на последната COP28 конференција за климатски промени.
