Во остар дипломатски тон, Грција одговори на изјавите на турскиот министер за надворешни работи Хакан Фидан, кој предупреди дека продлабочувањето на трипартитната соработка меѓу Грција, Израел и Кипар би можело да има дури и воен потенцијал.
Атина категорично ги отфрли ваквите тврдења, оценувајќи ги како неосновани и дел од реторика што создава непотребни тензии. Од грчкото Министерство за надворешни работи порачаа дека надворешната политика на земјата се води самостојно и без надворешни диктати, нагласувајќи дека не постои обврска за објаснување на таквите позиции кон други држави.
Во реакцијата се истакнува дека соработката со Израел, како и пошироката рамка во која учествува и Кипар, има јасно дефиниран мирен карактер и не е насочена против трети страни. Како членка на Европската унија и НАТО, како и активен учесник во рамките на Обединетите нации, Грција се позиционира како фактор што промовира стабилност и добрососедски односи во регионот.
Министерството дополнително потенцира дека обидите за ширење страв и искривување на реалноста не придонесуваат за регионалната безбедност, особено во период на зголемена геополитичка неизвесност.
Во поширокиот контекст, израелската страна во последниот период упатува критики кон Турција, обвинувајќи ја за поддршка на Хамас, додека на социјалните мрежи сè почесто се појавуваат содржини што поттикнуваат на конфронтациски наративи и шпекулации за можни директни судири меѓу Израел и Грција против Турција.
