Во Благоевград по 23-ти пат се одржа традиционалната ретро парада на автомобили, која на плоштадот „Георги Измирлиев“ собра љубители на класични возила од Бугарија, Србија, Грција и Македонија. На годинашното издание учествуваа повеќе од 250 автомобили и мотоцикли.
Организатори на настанот се членовите на ретро клубот „Пирин“ од Благоевград, кои годинава одбележуваат и 30 години постоење.
На отворањето на парадата, заменик-градоначалникот за култура, спорт и туризам на Општина Благоевград, Станислав Кимчев, истакна дека ова е еден од најомилените настани во градот и се заблагодари на сите учесници и љубители на ретро возилата за големиот интерес.
Во рамки на програмата настапи и Биг Бенд – Благоевград, а по дефилето низ градот, колоната стари автомобили продолжи кон Симитли. Финалната дестинација на парадата е Разлог, каде вечерва на плоштадот „Преображение“ се очекува да бидат изложени околу 200 ретро автомобили.
