Хрватскиот премиер Андреј Пленковиќ изјави дека Загреб внимателно го следи забрзаното вооружување на Србија, оценувајќи го процесот како „речиси шопинг-манија“.
Пленковиќ ова го кажа во Загреб на прес-конференција со баварскиот премиер Маркус Зедер, коментирајќи ги претходните изјави на хрватскиот министер за одбрана Иван Анушиќ за военото зајакнување на Србија.
„Станува збор за неверојатен процес на вооружување, речиси шопинг-манија низ сите делови на светот“, рече Пленковиќ, додавајќи дека сите земји кои се граничат со Србија треба да се запрашаат зошто Белград толку многу се вооружува.
Хрватскиот премиер наведе дека прашањето за вооружувањето на Србија било разгледувано и во рамки на хрватските институции задолжени за одбраната и националната безбедност.
Истовремено, Пленковиќ истакна дека Хрватска во последните десет години го зголемила буџетот за одбрана за трипати. Според него, воените способности што ги развива Загреб не се закана за другите држави, туку служат како средство за одвраќање.
„Тоа не е закана за никого, туку средство за одвраќање за да не се повтори агресијата од деведесеттите“, рече тој.
Пленковиќ потврди дека Хрватска разговара со своите меѓународни партнери за вооружувањето на Србија и дека тие се запознаени со ситуацијата.
Изјавите следуваат откако хрватскиот министер за одбрана Иван Анушиќ претходно предупреди на забрзаното вооружување на Србија и оцени дека Белград набавува современи воени системи во повеќе земји.
