Бугарија ја започна 2026 година како 21-ва членка на еврозоната, збогувајќи се со националната валута левот, кој со децении беше симбол на државноста. Речиси две децении по пристапувањето во Европската Унија, земјата официјално премина на евро, потег што отвори нови надежи, но и сериозни грижи кај граѓаните и бизнисот.
Иако властите очекуваат економски придобивки, дел од населението стравува дека воведувањето на еврото ќе донесе повисоки цени и дополнително ќе ја продлабочи политичката нестабилност. Според истражување на Евробарометар, 49 проценти од Бугарите се против преминот на заедничката европска валута, што ја отсликува длабоката поделба во општеството.
Претседателот Румен Радев во новогодишното обраќање го оцени воведувањето на еврото како последен чекор во интеграцијата на Бугарија во ЕУ, но истовремено изрази жалење што граѓаните не добиле можност да се изјаснат на референдум. Тој укажа дека масовните протести и падот на владата во декември се показател за јазот меѓу политичката елита и јавноста, што ја турка земјата кон нови избори – осми по ред за пет години.
Од Брисел и Франкфурт пристигнаа честитки. Претседателката на Европската централна банка, Кристин Лагард, порача дека еврото е симбол на заеднички вредности и колективна сила, додека Урсула фон дер Лајен оцени дека членството во еврозоната ќе ја зголеми транспарентноста, конкурентноста и ќе ја олесни трговијата и движењето на граѓаните.
Сепак, секојдневните грижи доминираат. Во ноември, цените на храната пораснаа за пет проценти на годишно ниво, што е значително над просекот во еврозоната. Дел од трговците се жалат на недостиг од готови евра и доцнење на почетните пакети со новата валута, додека граѓаните стравуваат од „тивки“ поскапувања.
Премиерот Росен Жељазков се обиде да ја смири јавноста, истакнувајќи дека инфлацијата не е директно поврзана со воведувањето на еврото и повика на трпение и разбирање. Но, критичарите, особено од националистичките и крајно десничарските партии, продолжуваат да предупредуваат дека Бугарија ќе ја плати цената за долговите и економските проблеми на поголемите членки на еврозоната.
