Косово минатата недела ги примило беспилотните летала „AeroVironment RQ-20 Puma“ набавени од САД, објави министерот за одбрана во технички мандат, Ејуп Маќедонци.
Тој на својот профил на Фејсбук истакна дека леталата се набавени преку меѓудржавна програма, а плаќањето за набавката е извршено во 2021 година. Според него, „Puma“ и другите беспилотни летала претставуваат важен капацитет за зајакнување на способностите на Косовските безбедносни сили во областа на беспилотните системи.
„Соработката со САД во одбраната постојано се продлабочува и проширува, придонесувајќи за развојот на нашата армија и за остварувањето на заедничките интереси на двете земји“, напиша Маќедонци.
„RQ-20 Puma“ е мало електрично беспилотно летало кое се лансира од рака, а примарно се користи за надзор и собирање разузнавачки информации преку електрооптичка и инфрацрвена камера.
