Брисел јасно стави до знаење дека не планира да го финансира новиот гасовод кој би ја поврзал Хрватска со Херцеговина. Претставништвото на Европската Унија во Сараево, во официјално соопштение пренесено од „Независне новине“, нагласува дека идните инвестиции во Босна и Херцеговина мора да бидат насочени кон обновливи извори на енергија, додека проекти поврзани со фосилни горива, како што е планираниот Јужен интерконектор, нема да добијат поддршка.
Проектот за нов гасовод, кој предвидува поврзување од Загвозд во Хрватска до Посушје, со гранки кон Мостар и Нови Травник, е проценет на околу 500 милиони евра и се планираше да биде во функција до крајот на 2027 година. Гасоводот требаше да овозможи пристап до терминалот за течен природен гас на островот Крк и снабдување со американски течен гас.
Но, Брисел потенцира дека таквите проекти само ја зголемуваат зависноста од фосилни горива и се во спротивност со европските климатски цели. Според стратегијата на ЕУ за климатска неутралност до 2050 година, природниот гас може да служи како привремена замена за јаглен, но неговата употреба мора да се намали веднаш штом земјата обезбеди доволно обновливи извори на енергија.
„Енергетската политика на ЕУ е јасна: иднината е во чистата енергија. Тоа е клучен предуслов за приближување кон членство во ЕУ, како и можност за модернизација на енергетскиот сектор, привлекување инвестиции и обезбедување долгорочна енергетска сигурност“, стои во соопштението.
