Хрватските инспекции блокираа 20 тони домати и 5,5 тони праски произведени во Албанија поради присуство на пестициди и високи нивоа на тешкиот метал никел. Лабораториските тестови покажаа дека доматите од Берат содржеле 0,06 мг/кг пестициди, шест пати повеќе од дозволената граница од 0,01 мг/кг, додека праските од Дивјак имале високи концентрации на никел, поради што биле уништени.
Според експертите, проблемот произлегува од практики на албанските земјоделци кои често користат заштитни средства во оранжерии без да ги почитуваат законските норми. Ова не само што создава финансиски загуби за извозниците, туку ја намалува и репутацијата на производите „made in Albania“.
Албанското овошје и зеленчук редовно се извезуваат во соседните земји, но во пограничните региони граѓаните често ги набавуваат директно од локалните земјоделци.
