Се појавува нов тренд на „Јутјуб“: вештачката интелигенција полека ја зазема платформата, а новите корисници несвесно се изложени на голем број ВИ-видеа. Истражување покажува дека повеќе од една петтина од видеата што алгоритмите им ги препорачуваат на новите профили се всушност генерирани од вештачка интелигенција.
Научниците креирале нов профил за потребите на студијата и од првите 500 препораки на алгоритмот, 104 видеа се покажале како нискоквалитетни ВИ-креации. Една третина од нив спаѓале во категоријата „brainrot“ — содржини создадени само за да го држат гледачот „заплеткан“ без вистинска вредност.
Но, проблемот не се ограничува само на новите корисници. Анализата на 15.000 најпопуларни јутјуб-канали открила дека 278 од нив постојано објавуваат исклучиво „ВИ-слотс“ — видеа создадени со цел да го зголемат бројот на прегледи. За нив, тоа е голем бизнис: овие канали заедно оствариле повеќе од 63 милијарди прегледи, собрале 221 милион претплатници и генерирале околу 117 милиони долари годишно.
