Украинскиот претседател Володимир Зеленски потврди дека руските сили го нападнале градот Покровск на истокот на Украина, каде што се водат интензивни улични борби. Според него, токму ова подрачје е моментално најголемото жариште на конфликтот.
„Разговарав со нашите војски – посебно внимание е насочено кон Покровск и соседните области“, изјави Зеленски, нагласувајќи дека најголемата концентрација на руските јуришни сили и најинтензивната офанзивна активност е токму таму.
Претседателот додаде дека секој успех на украинските сили во овој сектор е успех за целата Украина и за одбраната на државата.
Според извештаите на Укринформ, од почетокот на денот се забележани 101 судир меѓу украинските и руските сили, а борбите продолжуваат во шест сектори на фронтот. Покрај Покровск, најголема активност на руската офанзива се забележува и во секторот Костјантиновка, а зголемена активност има и во областа на Олександрохрад.
