Украинскиот претседател Володимир Зеленски остро реагираше на јавните повици на американскиот претседател Доналд Трамп, за тоа Украина да направи отстапки во преговорите со Русија. Во интервју за Аксиос, Зеленски рече дека ваквиот јавен притисок не е фер, истакнувајќи дека секој план кој би барал од Украина да се откаже од територии што Русија не ја освоиле во источниот регион Донбас, ќе биде одбиен од граѓаните доколку се стави на референдум.
„Се надевам дека ова е само тактика, а не конечна одлука“, рече Зеленски додека во Женева се одвиваа преговори меѓу руски, украински и американски делегации. Трамп неодамна изјави дека Украина мора брзо да седне на преговарачка маса и да преземе чекори за успешност на разговорите, без да спомне какви отстапки се очекуваат од Москва.
На првиот ден од преговорите, украинскиот преговарач Рустем Умеров истакна дека дискусиите се фокусирале на практични детали и механиката на можните одлуки, без да се откриваат конкретни информации. Според извори од руските медиуми, разговорите биле „многу напнати“ и траеле шест часа во различни билатерални и трилатерални формати. Двете страни се согласија дискусиите да продолжат во среда.
Додека дипломатијата се обидува да најде решение, борбите продолжуваат на теренот. Украински беспилотни летала, според соопштение на СБУ, ја погодија нафтената станица Таман во јужниот руски регион Краснодар и фабриката „Метафракс Хемикалс“ во Перм, на околу 1.600 километри од Украина, еден од најголемите производители на метанол во Русија и Европа. Ова е втор напад врз терминалот Таман од 22 јануари.
