Новите меѓународни санкции против руските нафтени компании ќе предизвикаат годишни загуби од најмалку 50 милијарди долари за Москва, изјави украинскиот претседател Володимир Зеленски, повикувајќи се на податоци од украинската Служба за надворешно разузнавање, пренесува Укринформ.
Зеленски истакна дека веќе се забележуваат значителни економски последици од ограничувањата воведени од западните партнери, кои сериозно ја погодиле руската нафтена индустрија. „Имаме прелиминарни разузнавачки проценки за ефектите на новите санкции. Врз основа на тие информации, ги усогласуваме нашите дипломатски активности и се подготвуваме за дополнителни мерки“, рече тој.
Украинскиот претседател изрази уверување дека доколку продолжи „постојаниот и принципиелен притисок“ врз Русија, нејзините финансиски загуби ќе се зголемат уште повеќе. Тој додаде дека Киев очекува нов бран санкции од западните земји, при што дел од нивните предлози веќе се разгледуваат од страна на партнерите.
Зеленски потенцираше дека санкциите против руската флота танкери мора целосно да се спроведат, бидејќи токму тие претставуваат клучен елемент во извозот на нафта и заобиколувањето на ограничувањата.
„Количините нафта што арапските земји ги внесуваат на глобалниот пазар можат да спречат дестабилизација или раст на цените со кои Русија се обидува да манипулира“, изјави Зеленски, нагласувајќи дека Украина редовно разменува информации со клучните партнери за идентификување на нови цели за санкции.
