Една од најстарите руски рафинерии за нафта, лоцирана во Саратов, целосно го запрела преработувањето на сурова нафта по напад со беспилотни летала, објави Reuters, повикувајќи се на извори од индустријата.
Според информациите, рафинеријата ги прекинала сите операции по нападот во кој била оштетена единицата CDU-6 – единствената примарна постројка за преработка на сурова нафта во објектот, со капацитет од околу 20.000 метрички тони дневно.
Рафинеријата, која е во сопственост на руската компанија „Роснефт“, претставува една од најстарите во Русија и е клучен производствен капацитет за снабдување со гориво во регионот на Волга. Во текот на 2024 година таму биле преработени околу 5,8 милиони тони сурова нафта, што претставува приближно 2,2 проценти од вкупниот руски капацитет за рафинирање. Во постројката се произведуваат бензин, дизел и мазут.
Ова е трет прекин на работата на саратовската рафинерија годинава поради напади со дронови. Претходни прекини беа регистрирани во март и мај. По најновиот напад, рафинеријата престанала да нуди нафтени деривати на Берзата за стокови производи во Санкт Петербург, што укажува на прекин во снабдувањето.
Гувернерот на Саратовската област, Роман Бусаргин, потврди дека во нападот биле погодени цивилни индустриски објекти, при што едно лице загинало, а неколку биле повредени, но не ја именуваше директно рафинеријата.
Нападот врз Саратов следува само неколку дена по прекинот на работата и на најголемата руска рафинерија во Омск, исто така по напад со беспилотни летала. Според аналитичарите, серијата удари врз руската енергетска инфраструктура дополнително го зголемува притисокот врз домашното снабдување со гориво, што веќе доведе до недостиг, раст на цените и воведување ограничувања на извозот на одредени нафтени деривати.
