По повеќе недели на очекувања и противречни изјави, станува јасно дека Украина нема да добие американски крстосувачки ракети Томахавк во блиска иднина, соопшти американскиот претседател Доналд Трамп.
Британскиот воен аналитичар Мајкл Кларк коментира дека Русија е загрижена поради дострелот и прецизноста на овие проектили. „Ако САД беа подготвени да ѝ дадат доволен број Томахавк, тоа би можело значително да го промени размислувањето на Русија за продолжување на војната“, објаснува Кларк.
Сепак, Украина нема причина за очај, бидејќи веќе располага со алтернативи – британско-француските проектили Storm Shadow/SCALP и домашните ракети Flamingo. Кларк додава дека ако Украина го зајакне производството на Flamingo, тие би можеле да извршат задачи што моментално се планирани со Томахавк.
Според аналитичарот, доколку војната продолжи до следното лето, Украина може да стекне значителна предност во производството на овие ракети. Русија веќе се обидува да ги таргетира производствените локации, а дел од производството е преместено во Европа за да се заштити.
Во моментов, Украина произведува околу 50 ракети Flamingo месечно, со план да го зголеми производството на речиси 200 месечно во наредните месеци. Сепак, се уште нема потврда дека овие проектили се користени за удари длабоко во Русија, што остава простор за сомнеж за нивниот вистински дострел и моќ.
