Венецуелската влада започна обука на цивили за ракување со оружје во случај на американски напад, изјави претседателот Николас Мадуро во саботата. Под мотото „Касарната оди кај народот“, војниците веќе организираа први тренинзи во повеќе региони низ земјата.
Мадуро ги повика земјоделците да бидат подготвени и, ако е потребно, масовно да се вооружат. „Венецуелскиот народ му порачува на царството: Престанете со заканите!“, изјави тој на собир со земјоделци, додавајќи дека земјата е пообединета од кога било во одбрана на својот суверенитет.
Напнатоста со САД ескалираше откако пред само неколку дена Венецуела одржа голема воена вежба на Карибите. Американскиот претседател Доналд Трамп во петокот објави дека е извршен најмалку трет напад врз бродови за кои Вашингтон тврди дека превезувале дрога од Венецуела.
Според Трамп, во операцијата учествуваат седум воени бродови, нуклеарна подморница и борбени авиони Ф-35. Тој во саботата дополнително ја засили реториката, предупредувајќи преку „Truth Social“ дека Венецуела мора да прифати враќање на сите затвореници кои, како што вели, ги испратила во САД, или ќе се соочи со „немерлива цена“.
Мадуро ги отфрли американските обвинувања за вмешаност на неговата земја во трговијата со дрога, тврдејќи дека само пет проценти од наркотиците произведени во Колумбија минале низ Венецуела, од кои 70 проценти биле пресретнати и уништени од венецуелските власти.
