Американскиот претседател Доналд Трамп испрати остро предупредување до Иран, најавувајќи дека САД се подготвени за воена ескалација доколку не успеат мировните преговори што се одржуваат во Пакистан.
Во интервју за американски медиум, Трамп изјави дека американските воени бродови веќе се полнат со најсовремена муниција и оружје, нагласувајќи дека САД се подготвени за „многу ефикасен“ одговор ако не се постигне договор.
Во меѓувреме, американскиот потпретседател Џеј Ди Венс отпатува во Исламабад, каде треба да се одржат клучните разговори со иранската страна. На него ќе му се придружат специјалниот пратеник Стив Виткоф и Џаред Кушнер, со цел да се постигне напредок по неодамнешното двонеделно примирје.
„Ќе знаеме за околу 24 часа дали ќе има договор“, изјави Трамп, оставајќи мал простор за оптимизам, но истовремено нагласувајќи дека САД се подготвени и за алтернативни сценарија.
Клучните точки на разговорите се очекува да бидат барањата на Вашингтон Иран да предаде значителни количини збогатен ураниум, како и повторно отворање на Ормутскиот теснец за меѓународен сообраќај.
