Смртоносен пожар избувна рано утринава во хотел во унгарската престолнина Будимпешта, при што има загинати лица, а повеќе од дваесет се повредени, дел од нив во тешка состојба.
Пожарот зафатил двокатна зграда – хотелот „Спорт“ на улицата „Зичи Петер“, при што покривот бил целосно уништен од пламените јазици. Според првичните информации, огнот најверојатно бил предизвикан од експлозија на плинска боца.
Пожарникарските екипи веднаш интервенирале на терен и успеале да евакуираат дел од присутните, но во урнатините биле пронајдени две тела. Спасувачките екипи продолжуваат со пребарување на теренот, бидејќи се стравува дека има уште лица кои се водат како исчезнати.
Градоначалничката Отилија Ѓери информираше дека пожарот избувнал во текот на ноќта и дека меѓу повредените има и лица со сериозни, животозагрозувачки повреди.
Според информациите од службите, пожарот избувнал околу 2:15 часот, а иако првично бил ставен под контрола, околу 7 часот наутро повторно се разгорел, што дополнително ја отежнало интервенцијата.
Подоцна, надлежните соопштија дека огнот е целосно изгаснат, додека истрагата за причините за несреќата е во тек.
