Руски патролен брод на граничната река Нарва, што ја дели Русија и Естонија, бил забележан како плови под знамето на платеничката група Вагнер, потврдија естонските власти на 2 ноември.
Инцидентот, кој се случи на границата со членка на НАТО, предизвика остра реакција од Талин, кој оцени дека тоа е доказ дека „рускиот челичен систем се распаѓа“ под притисокот на војната во Украина и санкциите на Западот.
„Можеме само да претпоставиме дали духот на готвачот Пригожин сè уште лебди во Русија – дали Вагнер повторно се насочува кон Москва или кон Санкт Петербург“, се наведува во соопштението на естонското Министерство за надворешни работи.
Групата Вагнер, предводена од Јевгениј Пригожин, беше клучен играч во најжестоките битки во Украина, сè до вооружената побуна во 2023 година. Пригожин загина два месеца подоцна во мистериозна авионска несреќа.
Од тогаш, руските власти се обидуваат да ја стават групата под целосна државна контрола, додека Естонија, Украина и други земји ја прогласија за терористичка организација.
Напнатоста на границата расте: Естонија во последните недели пријави повеќе руски провокации, меѓу кои и упад на борбени авиони МиГ-31 во нејзиниот воздушен простор и појава на наоружани лица на руската страна на границата.
