Американскиот државен секретар Марко Рубио изјави дека САД ја сметаат за неприфатлива понудата на Иран за повторно отворање на Ормуската Теснина под услови кои, според Вашингтон, подразбираат иранска контрола врз меѓународната пловидба.
Рубио истакна дека идејата за отворање на стратешкиот морски премин, но со задолжителна координација и дозвола од Иран, претставува обид за ограничување на слободната пловидба.
„Тоа не е вистинско отворање на Ормуската Теснина. Не може една држава да одлучува кој ќе минува низ меѓународни води“, изјави Рубио, предупредувајќи дека САД нема да прифатат таков пристап.
Тој додаде дека Вашингтон нема да дозволи, како што рече, меѓународните поморски патишта да бидат користени како средство за притисок или политичка контрола.
Во однос на пошироките односи со Техеран, Рубио оцени дека Иран покажува одредена подготвеност за дијалог, но нагласи дека секој иден договор мора јасно да спречи развој на нуклеарно оружје.
Според него, економската состојба во Иран дополнително се влошува поради санкции, инфлација и внатрешни финансиски проблеми, што, како што наведе, создава дополнителен притисок врз тамошното раководство.
Во меѓувреме, Иран наводно доставил нов предлог преку посредници, со кој се предлага деескалација на конфликтот и постепено решавање на спорот околу Ормуската Теснина, како и продолжување или трајно прекинување на непријателствата, пренесуваат меѓународни извори.
