Иран остро реагира на најновите израелски напади врз Либан, оценувајќи ги како „очигледно кршење“ на примирјето постигнато меѓу САД и Иран. Претседателот Масуд Пезешкијан предупреди дека продолжувањето на нападите може да ги направи преговорите бесмислени.
Во објава на X, тој порача: „Нашите прсти се на окидачот. Иран никогаш нема да ги остави своите либански браќа и сестри.“
Израелската војска вчера изведе серија воздушни напади врз Бејрут и јужните предградија, погодувајќи стамбени и деловни области. Според привремените податоци на либанското Министерство за здравство, во нападите загинале најмалку 254 лица, а околу 900 се повредени.
Либанскиот премиер Наваф Салам прогласи национален ден на жалост, при што сите јавни институции и општини беа затворени, а знамињата спуштени на пола копје.
