Австралиската забрана за користење социјални мрежи од страна на лица под 16 години веќе ја остави својата трага – компанијата „Мета“ објави дека во периодот од 4 до 11 декември деактивирала над 544.000 профили на своите платформи.
Најголем дел од нив биле на „Инстаграм“ – 330.639, следува „Фејсбук“ со 173.497, а 39.916 профили биле отстранети од новата платформа „Тредс“.
Забраната, која стапи на сила на 10 декември, е прва од ваков вид во светот и опфаќа десет големи социјални мрежи, меѓу кои и „ТикТок“, „Снепчет“, „Редит“ и „Јутјуб“. Компаниите имаат една година да воведат мерки за проверка на возраста, а прекршувањата се соочуваат со казни до 49,5 милиони австралиски долари (околу 33 милиони американски долари).
„Мета“ признава дека усогласувањето со законот е „повеќеслоен процес“ и најави продолжување на напорите за подобрување на системите за проверка на возраст. Компанијата истакнува дека утврдувањето на возраста на интернет е сложена задача, особено без унифициран индустриски стандард.
Во објава на својот блог, „Мета“ ги повика властите на „конструктивен дијалог“ со индустријата, предлагајќи наместо строги забрани, сите компании да работат на побезбедни и соодветни онлајн искуства за младите. Компанијата истакнува дека најлогично решение е продавниците за апликации да проверуваат возраст и да бараат согласност од родителите пред децата да можат да преземат апликации.
