Францускиот претседател Емануел Макрон потенцираше дека иднината на Украина не може да се решава без вклученост на самите Украинци, кои повеќе од три години се борат за својата слобода и безбедност. Оваа изјава доаѓа само неколку дена пред планираната средба меѓу рускиот претседател Владимир Путин и американскиот претседател Доналд Трамп.
„Иднината на Украина не може да се одлучи без Украинците. Тие се во првите редови на борбата за слобода и безбедност“, напиша Макрон на социјалната мрежа X. Тој додаде дека и Европејците мора да бидат дел од решението, со оглед на важноста на безбедноста во регионот.
Макрон претходно имал телефонски разговори со украинскиот претседател Володимир Зеленски, германскиот канцелар Фридрих Мерц и британскиот премиер Кир Стармер, со цел да ја ускладат позицијата пред дипломатските напори.
По разговорот, Зеленски истакна дека Украина, Франција и другите партнери се посветени на постигнување вистински мир.
Средбата меѓу Путин и Трамп е закажана за петок во Алјаска, а според извештаите, Путин инсистира на целосна руска контрола над источните региони Донецк и Луганск, што украинскиот претседател категорично го одбива.
