Кој е Кирил Дмитриев? „Човекот од сенка“ на Путин и еден од архитектите на планот за Украина

Кирил Дмитриев, директор на Рускиот фонд за директни инвестиции (RDIF), се смета за еден од клучните луѓе зад мировниот план на Доналд Трамп за Украина. Неговата улога во руската надворешна политика значително порасна по враќањето на Трамп во Белата куќа во 2025 година.

Образован на Станфорд, со искуство во Goldman Sachs и McKinsey, Дмитриев градел кариера во Русија и Украина, водејќи фондови вредни стотици милиони долари. Во 2011 година стана шеф на RDIF, фонд креиран за привлекување западен капитал, поради што уште на почетокот на војната заврши на списокот со американски и европски санкции.

Во јануари 2025 година се појави како еден од главните руски преговарачи во разговорите за Украина и во комуникацијата со администрацијата на Трамп. Во февруари, Путин официјално го назначи за специјален претседателски пратеник за инвестиции и меѓународна економска соработка.

Дмитриев важи за еден од најважните неформални дипломатски канали на Кремљ. Додека Сергеј Лавров комуницира со државниот секретар Марко Рубио, Дмитриев одржува директни контакти со американскиот специјален претставник Стив Виткоф.

Неговото влијание не произлегува само од кариерата, туку и од блиските врски со руската политичка елита. Особено значајна е поврзаноста со Јекатерина Тихонова, за која се смета дека е ќерка на Владимир Путин, што, според аналитичарите, му обезбедило моќна позиција во руските кругови.

Дмитриев веќе со години делува како посредник во руско-американските односи. Уште во 2020 година, The Daily Beast го опиша како „Путиновиот човек за пари“ со директни канали до Џаред Кушнер. Неговото влијание повторно порасна по 2023 година, кога наводно ги организирал ретките меѓународни патувања на Путин, вклучувајќи ги посетите на Саудиска Арабија и ОАЕ.