Шпанските здравствени власти соопштија дека пациентот кај кого привремено бил потврден хантавирус се наоѓа во стабилна состојба, иако во текот на ноќта развил лесни симптоми, меѓу кои покачена температура и отежнато дишење. Мажот е хоспитализиран во мадридската болница „Гомез Улја“, а лекарските тимови внимателно ја следат неговата состојба.
Според информации објавени во шпанските медиуми, засега не е регистрирано сериозно влошување на клиничката слика, што им дава надеж на здравствените служби дека случајот ќе остане под контрола. Во меѓувреме, вниманието на јавноста се насочи кон мерките што биле преземени при транспортот и тестирањето на патниците поврзани со случајот.
Претседателот на Канарските Острови, Фернандо Клавихо, оцени дека регионалната администрација навремено предупредувала за потенцијалните опасности и повторно ја критикуваше централната власт во Мадрид. Тој нагласи дека локалните институции уште претходно побарале PCR тестирање да се изврши директно на бродот, со цел да се избегне дополнителен ризик од ширење на инфекцијата.
Клавихо посочи дека појавата на уште три позитивни случаи во последните часови, според него, ја оправдува загриженоста на регионалните власти и ја потврдува потребата од построги здравствени протоколи во вакви ситуации.
